Heydər Əliyev
Heydər Əliyev öz müdrik rəhbərliyi, siyasi uzaqgörənliyi, qətiyyəti və əzmkarlığı ilə zəmanəmizin görkəmli siyasi xadimi kimi tanınmış, Azərbaycan xalqının ümummilli liderinə çevrilmişdir. Azərbaycanda dövlətçilik ənənələrinin XX əsrin sonlarında bərpa edilib zənginləşdirilməsi, Azərbaycanın müstəqilliyinin möhkəmləndirilməsi, onun əbədi, dönməz xarakter alması, ölkəmizin dinamik iqtisadi inkişaf yolu ilə inamla irəliləməsi, onun beynəlxalq nüfuzunun sürətlə artması Heydər Əliyevin səmərəli fəaliyyəti sayəsində mümkün olmuşdur. Ulu öndər Heydər Əliyevin xatirəsinə ehtiram əlaməti olaraq kitabxanamızda dahi şəxsiyyətin həyat və fəaliyyətini əks etdirən kitabların virtual sərgisi yaradılmışdır.
9 May - Qələbə Günü
Böyük Vətən müharibəsi dövründə SSRİ tərkibinə daxil bütün xalqlar ilə birlikdə Azərbaycan xalqı da hitlerçi işğalçılara qarşı qəhrəmancasına mübarizə aparıb. 1941-1945-ci illərdə təqribən 700 min həmvətənimiz ön cəbhəyə yola düşmüş və amansız düşmənlə mübarizədə onların yarısı qəhrəmanlıqla həlak olmuşdur. Respublikamızın on minlərlə vətəndaşı, azərbaycanlılar döyüşlərdə fərqləndiklərinə, qəhrəmanlıq göstərdiklərinə görə yüksək orden və medallarla təltif edilmişlər. Azərbaycandan cəbhəyə getmiş, döyüşlərdə qəhrəmanlıq göstərmiş 130 nəfər ən yüksək ada – Sovet İttifaqı Qəhrəmanı adına layiq görülmüşdür. Qazanılmış qələbədə əsas amillərdən biri də Bakı neftidir. Həmin dövrdə Sovetlər İttifaqında çıxarılan neftin 70 faizi Azərbaycanda hasil edilirdi. Bu qədər neft Azərbaycan neftçilərinin fədakar əməyi sayəsində istehsal olunurdu. Xalqımız alman faşizmi üzərində qələbənin əldə edilməsi naminə həlak olmuş həmvətənlərimizin xatirəsini əziz tutaraq daima yad edir.
Qarabağ Azərbaycandır!
Qarabağ Azərbaycanın ən qədim və gözəl guşələrindən biridir. Azərbaycanın poeziya və musiqi beşiyi olan Qarabağ Azərbaycan Respublikasının əzəli-əbədi torpağı, ayrılmaz tərkib hissəsidir. Qarabağ həm də bir çox görkəmli Azərbaycan alimlərinin, yazıçı və şairlərin, rəssam və musiqiçilərin vətənidir. Azərbaycan xalqının öz doğma torpağının bir parçasına verdiyi "Qarabağ" sözü ilk mənbələrdə hələ 1300 il bundan əvvəl (VII əsrdən!) işlənmişdir. Qarabağ əvvəllər tarixi-coğrafi bir anlayış kimi konkret məkanı bildirmiş, sonra isə Azərbaycanın geniş coğrafi ərazisinə aid edilmişdir. 2020-ci ildə 44-günlük Vətən müharibəsində Ali Baş Komandanımız İlham Əliyevin rəhbərliyi ilə rəşadətli ordumuz düşməni məğlub edib, babalarımızın yadigarı olan Qarabağı azad etdi. İşğaldan azad edilmiş Qarabağ hazırda yenidən qurulur, ərazilər minalardan təmizlənir, sürətlə genişmiqyaslı bərpa və yenidənqurma işləri aparılır. Kitabxanamızda Qarabağ haqqında müxtəlif dillərdə kitabların virtual sərgisi yaradılmışdır.
Bəxtiyar Vahabzadə - 100
Bəxtiyar Vahabzadə Azərbaycan xalqının XX əsrdə yetirmiş olduğu ən böyük simalarındandır. Görkəmli şair vətənpərvərlik, fəlsəfi düşüncələr, sevgi və insanlıq mövzularında dərin mənalı əsərləri ilə xalqımızın ruhuna toxunmuşdur. Şairin yaradıcılığı milli mədəniyyətin formalaşmasında və inkişafında mühüm rol oynayıb. Azərbaycan dilinin saflığı, təmizliyi və zənginləşməsi uğrunda mübarizə B. Vahabzadə yaradıcılığının mühüm istiqamətlərindən birini təşkil edib. B. Vahabzadə həm də alim kimi Azərbaycan elmi qarşısında xidmətlər göstərib. Azərbaycan ədəbiyyatında, ictimai fikir tariximizdə müstəsna rol oynayan B. Vahabzadə özündən sonra böyük bir irs qoyub. Həm şair, həm alim, həm də ictimai xadim kimi Azərbaycan dövlətçiliyinin, mədəniyyətinin inkişafına bənzərsiz töhfə verib. Azərbaycan Respublikasının Prezidenti İlham Əliyev Bəxtiyar Vahabzadənin 100 illik yubileyinin qeyd edilməsi haqqında Sərəncam imzalayıb. Yubiley tədbirləri ilə əlaqədar kitabxanamızda şairin həyat və yaradıcılığını əks etdirən kitabların virtual sərgisi yaradılmışdır.
Zərifə Əliyeva
Zərifə xanım Əliyevanın zəngin elmi irsi, oftalmologiyanın müxtəlif sahələri üzrə apardığı tədqiqatlar, qazandığı nailiyyətlər, yaratdığı fundamental əsərlər Azərbaycan tibb elminin parlaq səhifəsidir. Akademik Zərifə xanım Əliyeva zəngin mənəviyyata sahib əsl ziyalı kimi mənalı ömür yolu keçmiş, əhatəli elmi fəaliyyəti ilə ölkəmizdə tibb sahəsinin inkişafına əhəmiyyətli töhfələr vermişdir. Azərbaycan xalqı və dövləti öz dəyərli alimini, nəcib və xeyirxah insanı dərin ehtiram hissi ilə anır, daim xatirəsini əziz tutur.
Mir Cəlal
XX əsr Azərbaycan ədəbiyyatının görkəmlı simalarından olan Mir Cəlal Paşayev nasr, ədəbiyyatşünas, alim, müəllim, mütəfəkkir kimi tarixi bir iz qoyub. Mir Cəlal Paşayev Azərbaycan elminin, ədəbiyyatının, təhsilinin inkişafında misilsiz xidmətlər göstərmiş görkəmli yazıçı, böyük alim, xeyirxah insan kimi xalqımızın yaddaşında əbədiyaşarlıq haqqı qazanıb. O, milli şifahi ədəbiyyatın, klassik və bədii nəsrin ən yaxşı ənənələri əsasında yetişib, mahir hekayə ustası və romançı kimi yüksəlmişdir. Böyük şəxsiyyət Mir Cəlal Paşayevin xatirəsi daim qəlblərdə yaşayacaq, ədəbiyyatımızın, ədəbiyyatşünaslığımızın əbədi mövzusu olaraq qalacaq.
Azərbaycanlıların Soyqırımı
Azərbaycan xalqı 200 il ərzində erməni şovinistlərinin davamlı olaraq etnik təmizləmə, soyqırımı siyasətinə məruz qalmış, tarixi torpaqlarından qovulmuş, qaçqına, məcburi köçkünə çevrilmişdir. 1905-ci və 1918-ci illərdə erməni hərbi dəstələrinin həyata keçirdiyi kütləvi qətllər və talanlar, 1948-1953-cü illərdə soydaşlarımızın Ermənistan ərazisindəki ata-baba yurdlarından deportasiya edilməsi, 1988-ci ildən başlayaraq Dağlıq Qarabağı Azərbaycandan qoparmaq məqsədi güdən genişmiqyaslı müharibə, 1992-ci ilin Xocalı faciəsi – bunlar təcavüzkar erməni millətçilərinin azərbaycanlılara qarşı planlı surətdə həyata keçirdiyi soyqırımı siyasətinin qanlı səhifələridir. Xalqımıza qarşı törədilmiş soyqırımlar haqqında həqiqətləri real tarixi faktlar əsasında dünya dövlətlərinə və ictimai fikrinə çatdırmaq indiki nəslin müqəddəs vəzifəsi və borcudur.