1 iyun — Uşaqların Beynəlxalq Müdafiəsi Günü Ilk dəfə 1950-ci ildən etibarən qeyd olunmağa başlanmışdır. Bu günün təsis olunması ideyası Birləşmiş Millətlər Təşkilatının təşəbbüsü ilə keçirilən "Qadınların Beynəlxalq Konfransı"nda irəli sürülmüş, tədbirdə uşaqların hüquqlarının qorunması, onların sağlam və təhlükəsiz mühitdə böyüməsinin təmin olunması ilə bağlı mühüm təkliflər səsləndirilmişdir. Konfrans iştirakçıları tərəfindən 1 iyun tarixinin uşaqların beynəlxalq müdafiəsinə həsr olunması barədə qərar qəbul edilmiş və həmin tarixdən etibarən bu gün dünya ölkələrində xüsusi əhəmiyyətlə qeyd olunmağa başlanmışdır. Uşaqlar cəmiyyətin ən həssas və eyni zamanda ən dəyərli təbəqəsidir. Onların sağlam, savadlı, vətənpərvər və mənəvi dəyərlərə bağlı şəxsiyyət kimi formalaşması hər bir dövlətin gələcəyinin əsas təminatlarından hesab olunur. Buna görə də dünya ictimaiyyəti tərəfindən uşaqların hüquqlarının müdafiəsi, təhsil almaq, sağlam yaşamaq, təhlükəsiz mühitdə böyümək və sosial təminat hüquqlarının qorunması daim diqqət mərkəzində saxlanılır. Azərbaycanda da Uşaqların Beynəlxalq Müdafiəsi Günü hər il geniş şəkildə qeyd olunur. Dövlət tərəfindən uşaqların rifahının yüksəldilməsi, onların hüquq və azadlıqlarının müdafiəsi istiqamətində mühüm tədbirlər həyata keçirilir. Uşaqların keyfiyyətli təhsil alması, sağlamlığının qorunması, sosial müdafiəsinin gücləndirilməsi, asudə vaxtının səmərəli təşkili və milli-mənəvi dəyərlər ruhunda tərbiyə olunması dövlət siyasətinin prioritet istiqamətlərindən biridir. Xüsusilə xüsusi qayğıya ehtiyacı olan uşaqların müdafiəsi, onların cəmiyyətə inteqrasiyası və hərtərəfli inkişafı istiqamətində ardıcıl layihələr və proqramlar həyata keçirilir. 1 iyun münasibətilə təşkil olunan bu virtual sərgidə uşaqların hüquqları, tərbiyəsi, psixoloji və mənəvi inkişafı, eləcə də uşaqlara sevgi və qayğını əks etdirən kitablar, nəşrlər və müxtəlif mənbələr toplanmışdır. Sərginin məqsədi uşaqların cəmiyyət həyatındakı əhəmiyyətini diqqətə çatdırmaq, onların müdafiəsinin vacibliyini təbliğ etmək və oxucuları bu mövzu ilə bağlı ədəbiyyatla tanış etməkdir.