Ətraf mühitin mühafizəsi bəşəriyyətin qarşısında duran ən mühüm qlobal məsələlərdən biridir. Təbii sərvətlərdən səmərəli istifadə olunması, ekoloji tarazlığın qorunması, iqlim dəyişikliklərinin qarşısının alınması və insanların sağlam ətraf mühitdə yaşamaq hüququnun təmin edilməsi müasir dövrün əsas prioritetləri sırasındadır. 1972-ci il iyunun 5-də İsveçin Stokholm şəhərində Birləşmiş Millətlər Təşkilatının insan ətraf mühitinə həsr olunmuş ilk beynəlxalq konfransı keçirilmişdir. Konfransda ətraf mühit problemlərinin qlobal xarakter daşıdığı vurğulanmış, ekoloji məsələlərin həlli istiqamətində beynəlxalq əməkdaşlığın gücləndirilməsinin vacibliyi qeyd edilmişdir. Həmin konfransın qərarına əsasən 5 iyun tarixi "Ümumdünya Ətraf Mühit Günü" elan edilmiş və 1973-cü ildən etibarən dünya ölkələrində geniş şəkildə qeyd olunmağa başlanmışdır. Bu günün əsas məqsədi ictimaiyyətin diqqətini ətraf mühitin qorunmasına yönəltmək, insanların ekoloji məsuliyyətini artırmaq, təbiətin mühafizəsi ilə bağlı maarifləndirmə işlərini genişləndirmək və davamlı inkişaf prinsiplərinin təşviqinə nail olmaqdır. Hər il müxtəlif şüarlar altında keçirilən tədbirlər vasitəsilə ətraf mühitin çirklənməsi, biomüxtəlifliyin azalması, meşələrin məhv edilməsi, su ehtiyatlarının qorunması və iqlim dəyişiklikləri kimi aktual problemlər diqqət mərkəzinə gətirilir. Təqdim olunan virtual sərgidə ətraf mühitin mühafizəsi, ekoloji təhlükəsizlik, təbii sərvətlərin qorunması, davamlı inkişaf və ekoloji maarifləndirmə məsələlərinə həsr olunmuş kitablar, məqalələr və digər informasiya resursları yer almışdır. Sərginin məqsədi oxucuları ətraf mühit problemləri barədə məlumatlandırmaq, təbiətə qayğıkeş münasibətin formalaşdırılmasına töhfə vermək və ekoloji dəyərlərin təbliğini genişləndirməkdir.