Prezident Kitabxanasında 2 fevral – Azərbaycan Gəncləri Günü münasibətilə təşkil olunan virtual sərgidə gənclərin intellektual, sosial və mənəvi inkişafına dair tematik nəşrlər təqdim olunur. Sərginin məqsədi müasir Azərbaycan cəmiyyətində gəncliyin yeri və roluna dair sistemli məlumatların oxuculara çatdırılmasıdır.

Virtual sərgidə gənclər siyasətinin əsas istiqamətləri, gənclərin təhsil səviyyəsinin yüksəldilməsi, vətənpərvərlik tərbiyəsi, milli-mənəvi dəyərlərin qorunması, sosial fəallığın təşviqi və şəxsiyyətin formalaşması ilə bağlı mövzular geniş şəkildə əhatə olunur. Sərgidə təqdim edilən nəşrlər gənclərin fərdi inkişafı ilə yanaşı, onların cəmiyyətin sosial və ictimai həyatında iştirakını əks etdirən mühüm mənbələrdir.

Sərgi çərçivəsində dövlət gənclər siyasətinin konseptual əsaslarını, gənclərlə iş sahəsində formalaşmış elmi-nəzəri yanaşmaları və praktik təcrübəni əhatə edən nəşrlər oxucuların istifadəsinə təqdim olunub. Bu resurslar gənclər siyasətinin tarixi inkişaf mərhələləri və müasir dövrdə müəyyən edilmiş prioritetlər barədə dolğun təsəvvür yaradır. Virtual format mövzu üzrə mənbələrlə operativ və əlçatan şəkildə tanış olmağa imkan verir.

Virtual sərgi tədqiqatçılar və mütəxəssislərlə yanaşı, gənclər siyasəti, cəmiyyətin inkişaf prosesləri və gəncliyin sosial rolu ilə maraqlanan geniş oxucu auditoriyası üçün də əhəmiyyətli maarifləndirici resursdur.