Le Théâtre en famille

Lui Salyenin ailə və məktəb teatrı üçün yaratdığı “Le Théâtre en famille” (Ailə teatrı) toplusu XIX əsrə aid zərif bir fransız nəşridir. XIX əsrin ikinci yarısında Parisdə işıq üzü görmüş bu kitab öz dövrünün mühüm pedaqoji layihələrindən biri hesab olunur. Pyeslər gənc qızlar üçün nəzərdə tutulub və səhnə sənəti vasitəsilə onların mənəvi tərbiyəsinə yönəlib. Topluya ailə daxilində və ya təhsil müəssisələrində səhnələşdirilməsi əlverişli olan kiçikhəcmli dramlar və nəsihətamiz səhnəciklər daxil edilib. Süjetlər dövrün əsas mənəvi dəyərlərinə – valideynlərə hörmət, dürüstlük, təvazökarlıq, iman və daxili saflıq kimi məsələlərə toxunur. Müəllif canlı dialoqlar və emosional səhnələr vasitəsilə doğru həyat qayələri haqqında təsəvvür formalaşdırır. XIX əsr fransız kitab qrafikasının ən yaxşı ənənələrinə uyğun icra edilmiş orijinal qravür illüstrasiyalar nəşrə xüsusi bədii dəyər qatır. Onlar kitabı bəzəməklə yanaşı, personajların xarakterini və səhnələrin ab-havasını daha dərindən açmağa kömək edir. Bu nadir nəşr öz dövrünün maarifçi ədəbiyyatının parlaq nümunəsi olmaqla yanaşı, XIX əsr cəmiyyətinin qadın, ailə və mənəvi dəyərlər mövzusunda baxışlarını əks etdirir və əhəmiyyətli tarixi-mədəni dəyər daşıyır.