Чины двора и Свита Их Величеств (Почетный экземпляр действительному статскому советнику Гаджи-Зейналабдину Тагиеву)

«Saray rütbələri və Əlahəzrətin məiyyəti» (Həqiqi dövlət müşaviri Hacı Zeynalabdin Tağıyevə təqdim olunmuş şəxsi nüsxə) — nadir və əhəmiyyətli nəşr olub, Rusiya imperiyasının saray məmurlarının tərkibini və strukturunu təfərrüatı ilə açan dəyərli tarixi mənbədir. Böyük format (36 sm), portret illüstrasiyaları və dəbdəbəli tərtibatı onun yüksək əhəmiyyətini və müstəsna dəyərini vurğulayır. Nüsxə qızıl suyu ilə işlənmiş zərif dəri ilə cildlənib və bu da, onu təkcə əvəzolunmaz məlumat mənbəyinə deyil, həm də əsl incəsənət əsərinə çevirir. Zaqafqaziya xalqları arasında iki azərbaycanlı xeyriyyəçi Hacı Zeynalabdin Tağıyev və Murtuza Muxtarovun kitaba daxil edilməsi bu nüsxəyə xüsusi əhəmiyyət verir. Onların mədəniyyət və xeyriyyəçilik sahəsindəki müstəsna xidmətləri kitabın səhifələrində əks olunub, nüsxənin özü isə təntənəli şəkildə Hacı Zeynalabdin Tağıyevə təqdim edilib. Bu, təkcə onların xidmətlərinin etirafı deyil, həm də onların Rusiya imperiyası dövründə Zaqafqaziyanın ictimai-mədəni həyatında oynadığı mühüm rolun sübutudur. Bu gün həmin nüsxə Azərbaycanın kitab abidələri dövlət reyestrinə daxil edilib ki, bu da onun mədəni və tarixi dəyərini təsdiq edir.