Azərbaycanın Xalq artisti Firəngiz Əlizadədən Prezident Kitabxanasına dəyərli kitab hədiyyəsi
Azərbaycan Bəstəkarlar İttifaqının sədri, Xalq artisti, professor Firəngiz Əlizadə Prezident Kitabxanasına müxtəlif dillərdə nəfis nəşrlər hədiyyə etmişdir. Hədiyyə edilən kitablar müəllifin yaradıcılığı və Azərbaycan musiqi mədəniyyətinin zəngin tarixi barədə geniş məlumatları əhatə edir.
Nəşrlərdə Firəngiz Əlizadənin həyat və yaradıcılığı, simfonik musiqimizdəki rolu, eləcə də Üzeyir Hacıbəyli və digər görkəmli Azərbaycan bəstəkarlarının yaradıcılığına dair tədqiqatlar yer alır. Kitablar həmçinin müasir Azərbaycan musiqisinin inkişafında Firəngiz Əlizadənin töhfələrini, onun musiqisinin fəlsəfi və bədii xüsusiyyətlərini işıqlandırır, elmi və praktik aspektlər baxımından zəngin məzmun təqdim edir.
Bu hədiyyələr Prezident Kitabxanasının kolleksiyasını daha da zənginləşdirir, oxucular, musiqişünaslar və tədqiqatçılar üçün qiymətli informasiya mənbəyi kimi xidmət edir. Eyni zamanda nəşrlər Azərbaycan musiqi irsinin beynəlxalq səviyyədə tanıdılmasına və elmi araşdırmaların inkişafına mühüm töhfə verir.
Azərbaycan Bəstəkarlar İttifaqının sədri Firəngiz Əlizadənin Prezident Kitabxanasına etdiyi bu dəyərli hədiyyə milli musiqi mədəniyyətimizin qorunması və təbliği, həmçinin kitabxananın zəngin kolleksiyası və informasiya potensialının genişləndirilməsi baxımından xüsusi əhəmiyyət kəsb edir.
