Prezident Kitabxanasının fonduna 81 adda yeni kitab daxil olub. Rus və ingilis dillərində olan nəşrlər fondu əhəmiyyətli dərəcədə zənginləşdirərək oxuculara müasir beynəlxalq ədəbiyyata daha geniş çıxış imkanı yaradıb.

Yeni daxil olan nəşrlər mövzu müxtəlifliyi ilə diqqət çəkir. Kino sənəti sahəsində dünya kinematoqrafiyasının görkəmli nümayəndələrinin yaradıcılığına həsr edilmiş monoqrafiyalar, kinopsixologiya və film sənətinin tarixinə dair fundamental tədqiqatlar təqdim olunub. Təsviri sənət sahəsində klassik və müasir rəssamlığa, incəsənət tarixinə, rəng simvolikasına həsr edilmiş elmi nəşrlər yer alır. Sənət xadimlərinin, teatr ustadlarının və musiqi istedadlarının bioqrafiyalarını əks etdirən kitablar da fondun ayrılmaz hissəsinə çevrilib.

Bədii ədəbiyyat sahəsində dünya klassikləri və müasir nəsrin gözəl nümunələri geniş təmsil olunub. Nobel və Pulitzer mükafatları laureatlarının romanları, tarixi epopeyalar, fəlsəfi-bədii əsərlər oxucuların ixtiyarına verilib. Fəlsəfə və ictimai fikir sahəsində qədim dövr mütəfəkkirlərinin əsərlərindən tutmuş müasir düşüncə məktəblərinin tanınmış kitablarına qədər zəngin spektr təqdim edilir. Estetika, etika, sosial fəlsəfə və şəxsi inkişafa dair fundamental tədqiqatlar da kolleksiyada xüsusi əhəmiyyət kəsb edir.

Yeni nəşrlərin fonda daxil edilməsi Prezident Kitabxanasının informasiya bazasının sistemli şəkildə genişləndirilməsi strategiyasının tərkib hissəsidir. Bu, oxuculara həm klassik irs, həm də müasir beynəlxalq ədəbiyyat üzrə keyfiyyətli mənbələrə çıxış imkanlarının artırılmasına xidmət edir. Kitabxana öz fondunu ardıcıl olaraq zənginləşdirməklə milli kitabxana sistemində aparıcı mədəni-maarif mərkəzi statusunu möhkəmləndirir.