Azərbaycan Respublikasının əməkdar hüquqşünası, Azərbaycan Respublikası Konstitusiya Məhkəməsinin hakimi İsa Nəcəfov Prezident Kitabxanasına 8 adda 9 nüsxə kitab hədiyyə edib.

Hədiyyə olunan nəşrlər mövzu baxımından müxtəlif sahələri əhatə edir. Onların sırasında orta əsr elmi və fəlsəfi irsinə dair əsərlər, klassik elmi fikri əks etdirən mənbələr, tarix və tibb sahələrinə aid fundamental nəşrlər, eləcə də bədii nəsr janrında qələmə alınmış əsərlər yer alır. Bu kitablar Azərbaycan və ümumilikdə Şərq intellektual-mədəni irsinin müxtəlif istiqamətlərini əks etdirən qiymətli mənbələr kimi diqqəti cəlb edir.

Təqdim olunan ədəbiyyat arasında orta əsr təbabəti və fəlsəfi düşüncəsinə dair ensiklopedik mənbələr, həmçinin XX əsrin əvvəllərində baş vermiş tarixi hadisələri əks etdirən tədqiqat əsərləri də vardır. Bu baxımdan nəşrlər humanitar və ictimai elmlərin müxtəlif istiqamətlərini əhatə edən zəngin mövzu spektri ilə seçilir.

Kitablar sırasında müasir bədii yaradıcılığa aid əsərlər də yer alır. Onların bir qismi məhz İsa Nəcəfovun qələmindən çıxmış əsərlərdir ki, bu da təqdim edilən ədəbiyyatın məzmununu daha da şaxələndirir.

Prezident Kitabxanasına hədiyyə edilən bu kitablar fondun zənginləşməsinə töhfə verməklə yanaşı, geniş oxucu auditoriyası üçün müxtəlif sahələri əhatə edən yeni və dəyərli informasiya mənbələrinin əlçatanlığını artırır.

Prezident Kitabxanası təqdim olunan qiymətli hədiyyəyə görə İsa Nəcəfova təşəkkürünü bildirir.