22 aprel 2009-cu ildə Prezident Kitabxanasında “Naxçıvan Muxtar Respublikası - 85” adlı İnternet resursun təqdimatı keçirilib. Tədbir iştirakçıları, həmçinin Naxçıvana həsr olunmuş kitab sərgisi, “Muxtariyyət tarixi sənədlərdə” adlı arxiv materialları və Naxçıvana dair kitabların əməkdaşlarımız tərəfindən hazırlanmış elektron versiyaları ilə tanış olublar.
Tədbiri giriş sözü ilə açan kitabxananın direktoru Mayıl Əhmədov muxtar respublikanın 85 illik yubileyinin ölkəmizdə geniş qeyd olunduğunu bildirdi. Dövlət başçısı İlham Əliyevin bu barədə cari ilin fevralın 6-da imzaladığı sərəncama diqqət yönəldən M. Əhmədov, Azərbaycanın qədim tarixə, zəngin mədəniyyətə və çoxəsrlik dövlətçilik ənənələrinə malik Naxçıvan diyarının çətin, mürəkkəb və parlaq inkişaf yolu keçdiyini söylədi. Daha sonra kitabxananın direktoru, 7 bölmədən ibarət olan bu resursun istifadəçilərə Naxçıvan Muxtar Respublikası haqqında dolğun və operativ məlumat təqdim etdiyini vurğuladı.
Tədbirdə AMEA-nın müxbir üzvü Vəli Əliyev, Milli Məclisin deputatları Nizami Cəfərov, Yaqub Mahmudov, Eldar İbrahimov, Fəttah Heydərov, Siyavuş Novruzov, YAP İdarə Heyətinin üzvü Kərim Kərimov çıxış edərək bu internet resursun Naxçıvanın tarixinə, mədəniyyətinə, incəsənətinə, iqtisadiyyatına dair materialların dünya ictimaiyyətinə daha dolğun və operativ çatdırılması sahəsində mühüm vasitə olduğunu vurğulayıblar, öz təklif və mülahizələrini diqqətə çatdırıblar.
Naxçıvan Muxtar Respublikasının Bakı şəhərindəki daimi nümayəndəsi vəzifəsini icra edən Həsən Hacıyev Prezident Kitabxanasının kollektivinə Naxçıvana həsr olunmuş zəngin internet resurs yaratdıqlarına görə Muxtar Respublikanın rəhbərliyi adından minnətdarlığını bildirib.