17 yanvar 2020-ci il tarixində 20 Yanvar faciəsinin 30-cu ildönümü ilə əlaqədar Prezident Kitabxanasında nümayiş etdirilən foto və kitab sərgisinin açılış mərasimi keçirilib. Mərasimdə Azərbaycan, ingilis və rus dillərində hazırlanan “20 Yanvar. Təcavüz. 1990” elektron layihənin yenilənmiş versiyası da təqdim edilib.
Azərbaycan Respublikası Prezidentinin 20 yanvar faciəsinin otuzuncu ildönümünün keçirilməsi haqqında Sərəncamına əsasən Bakının 6, 8 və 23 saylı tam orta məktəblərinin bir qrup şagirdlərinin, dövlət qurumlarının təmsilçilərinin iştirakı ilə keçirilən tədbirdə əvvəlcə Kitabxananın Oxu zalında Kitabxana əməkdaşlarının hazırladıqları və 20 Yanvar qurbanlarının xatirəsinə həsr edilmiş videoçarx nümayiş etdirilib. Tədbir iştirakçılar həmçinin foto və kitab sərgisi ilə də tanış olublar.
Kitabxananın direktoru Mayıl Əhmədov bildirmişdir ki, 1990-cı ilin yanvarında Bakıda və Azərbaycanın bəzi rayonlarında törədilən qanlı qırğınlardan 30 il ötür. Bu müddətdə 20 Yanvar faciəsinin baş verməsinin səbəbləri, onun miqyası, ibrət dərsləri haqqında bir sıra tədqiqatlar aparılmış, məqalələr və kitablar yazılmış, ümummilli liderimiz Heydər Əliyevin təşəbbüsü ilə qanlı hadisəyə ölkənin ali qanunvericilik orqanı tərəfindən siyasi-hüquqi qiymət verilmişdir, sistemləşdirilmiş bir məlumat bazası yaradılmışdır.
Tədbirdə Bakı şəhəri 23 saylı tam orta məktəbin direktoru Yuliya Kərimova, professor Elçin Əhmədov, Dövlət Arxivinin direktoru Emin Sərdarov, Prezidentin İşlər İdarəsinin İctimai-Siyasi sənədlər Arxivinin direktoru Elmira Ələkbərova, Prezident Administrasiyasının məsul əməkdaşı Fazil Zeynalov çıxış edərək bu layihənin 20 Yanvar hadisələrinin öyrənilməsində və təbliğində çox dəyərli mənbə olduğunu vurğuladılar.