25 yanvar 2017-ci ildə Prezident Kitabxanasında görkəmli dövlət və elm xadimi Əziz Əliyevin həyat və fəaliyyətini özündə əks etdirən “Görkəmli dövlət və elm xadimi Əziz Əliyev (1897-1962)” adlı elektron layihənin təqdimatı olub.
Tədbir iştirakçıları əvvəlcə Oxu zalında təşkil edilən “Əziz Əliyev-120” sərgisi ilə tanış olublar.
Sonra Konfrans zalında elektron layihənin təqdimatı keçirilib.
Kitabxananın direktoru Mayıl Əhmədov bildirib ki, hər bir xalqın tarixində keçdikləri həyat yolu ilə hər zaman xatırlanan və nəsillərə örnək olan şəxsiyyətlər var. Azərbaycanın dövlətçilik və elm tarixində özünəməxsus yeri olan Əziz Məmmədkərim oğlu Əliyev belə şəxsiyyətlərdəndir. Mayıl Əhmədov Azərbaycan və rus dillərində hazırlanan elektron layihə haqqında geniş məlumat verib.
Digər çıxış edənlər də görkəmli dövlət və elm xadimi Əziz Əliyev haqqında ürək sözlərini söyləyib, unudulmaz alimin anadan olmasının 120 illiyi münasibətilə hazırlanan elektron resursu yüksək dəyərləndiriblər.