44 günlük Vətən müharibəsində əldə olunmuş tarixi qələbəmizi əbədiləşdirmək və işğaldan azad edilmiş şəhərlərin günlərini təsis etmək məqsədilə Azərbaycan Respublikasının Prezidenti 31 iyul 2023-cü il tarixində Sərəncam imzalayıb. Bu Sərəncama əsasən hər ilin avqust ayının 26-sının “Laçın şəhəri günü” kimi təntənəli şəkildə qeyd olunması qərara alınıb.
Prezident Kitabxanasının hazırladığı “Laçın” elektron layihəsi Şərqi Zəngəzur iqtisadi rayonuna daxil olan Laçın rayonunun tarixi, 30 il erməni işğalında viran edilmiş tarixi-mədəni və dini abidələrimiz, işğaldan azad edildikdən sonra genişmiqyaslı bərpa və quruculuq işləri və Böyük Qayıdış barədə seçmə materiallardan ibarət elektron topludur.