Сокровища исламской архитектуры

Bu kitab İslam ölkələrində yaşamış və yaratmış orta əsr memarlıq sənətkarlarının ən gözəl əsərlərinə həsr olunmuşdur. Orta əsr sənətkarı yaradıcılıq məhsulundan başqa özündən sonra heç bir xatirə, iz qoya bilmirdi. Biz orta əsr islam memarları haqqında demək olar ki, heç bir məlumata sahib deyilik, lakin qorunub saxlanılmış abidələr onları inşa edənlərin, dini baxışları, etnik mənsubiyyəti, bədii zövqləri, təhsil səviyyəsi, peşəkarlığı, istedadı və ixtiraçılığı barədə çox şey deyə bilər. İslam memarlığı ilk və ən böyük islam dövləti olan Ərəb xilafətinin (632–1258) qoynunda yaranmış və formalaşmışdır. Bu teokratik dövlətin yaranması və sürətli inkişafı islam dininin və ideologiyasının banisi, qədimdən müqəddəs sayılan Məkkə şəhərində doğulmuş Məhəmmədin dini nüfuzu və uğurlu siyasi fəaliyyəti ilə bağlıdır. Müsəlmanların təsəvvürünə görə, Məhəmməd vahid və tək Allahın elçisidir; o, peyğəmbərlik missiyası ilə seçilmiş və insanlara ilahi vəhyləri, müqəddəs kitab olan Quranı çatdırmışdır. Məhəmmədin peyğəmbərlik və siyasi fəaliyyəti təxminən 610-cu ildən başlayaraq əvvəlcə Məkkədə, 622-ci ilin ikinci yarısından etibarən isə Mədinədə davam etmiş və Mədinə ilk islam dövlətinin paytaxtına çevrilmişdir.